“Tolibon” yetakchisi Haybatulloh Oxundzoda amaldor va harakat a’zolariga smartfon ishlatishni taqiqladi. Nazorat harbiy sudlarga topshirildi.
Mazkur hujjat talablariga ko‘ra, o‘rnatilgan taqiqni buzgan har qanday amaldor harbiy sud qarshisida javob berishiga to‘g‘ri keladi, biroq qonunbuzarlarga nisbatan aynan qanday jazo choralari qo‘llanilishi hozircha ochiqlanmagan.
Davlat idoralari xodimlari o‘rtasida ushbu cheklovning ijrosini so‘zsiz ta’minlash va qat’iy nazorat o‘rnatish vazifasi harbiy sudlar xodimlariga yuklatildi. Mutasaddilar tomonidan nazorat ostiga olinishi kerak bo‘lgan barcha shaxslarning ism-shariflari, egallab turgan lavozimlari, xizmat joylari, shuningdek, aloqa operatorlari va telefon raqamlari to‘g‘risidagi ma’lumotlarni o‘z ichiga olgan maxsus maxfiy ro‘yxatlar shakllantirib bo‘lingan.
Davlat sektoridagi ushbu yangi tartib mamlakatda zamonaviy aloqa vositalaridan voz kechish borasidagi keng ko‘lamli cheklovlarning navbatdagi bosqichi bo‘ldi. Bundan bir necha kun muqaddam Afg‘onistondagi barcha maktablar va diniy madrasalarda ham smartfonlardan foydalanish rasman taqiqlangan edi.
Izohlar
Hozircha izohlar yo‘q