Qozog‘iston chet elliklar, jumladan O‘zbekiston fuqarolari uchun QazETA kirish ruxsatnomasini joriy etmoqda

Qozog‘iston xorijliklar uchun QazETA elektron kirish ruxsatnomasini joriy qilmoqda. O‘zbekistonliklar safardan 72 soat oldin bepul ruxsatnoma olishlari shart bo‘ladi.

QazETA tizimini bosqichma-bosqich joriy etish tartibi

Qozog‘iston Respublikasida xorijiy fuqarolar, jumladan O‘zbekiston Respublikasi fuqarolari uchun (qonunchilikda belgilangan alohida imtiyozli toifalardan tashqari) mamlakat hududiga kirishning yangi elektron nazorat tartibi tasdiqlandi. Endilikda chegara punktlaridan o‘tish uchun yo‘lovchilar oldindan QazETA maxsus yagona elektron tizimi orqali ruxsatnoma olishlari shart bo‘ladi.

Yangi tizim chegara nazorati jarayonlarini avtomatlashtirish, xavfsizlik darajasini oshirish hamda migratsiya oqimlarini tartibga solish maqsadida joriy etilmoqda. Transport infratuzilmasi va yo‘lovchilarning moslashishini ta’minlash uchun yangi qoidalar to‘rt bosqichda amaliyotga tatbiq etiladi:

• 2026-yil 1-noyabrdan: talab dastlabki bosqichda Oqtov shahri xalqaro aeroportida hamda «O‘rlyutobe», «Avxatti», «Atameken» va «Nurli jol» avtomobil o‘tkazish punktlarida kuchga kiradi.

• 2027-yil 1-yanvardan: tizim mamlakatning yirik aviatsiya hablariga — Ostona va Olmaota shaharlaridagi xalqaro aeroportlarga tatbiq etiladi.

• 2027-yil 1-martdan: tartib Qozog‘iston Respublikasi davlat chegarasidagi barcha qolgan avtomobil, temiryo‘l, aviatsiya va dengiz o‘tkazish punktlarida to‘liq majburiy bo‘ladi.

• 2027-yil 1-yuldan: o‘tish davri yakunlanib, QazETA elektron ruxsatnomasi to‘liq majburiy hujjatga aylanadi. Shu sanadan e’tiboran ruxsatnomaning mavjud emasligi xorijiy fuqaroga Qozog‘istonga kirishni rad etish uchun rasmiy huquqiy asos hisoblanadi.

Mamlakat Chegara xizmati ma’lumotlariga ko‘ra, 2027-yil 1-yulgacha bo‘lgan o‘tish davrida QazETA ruxsatnomasining yo‘qligi sababli yo‘lovchilar chegaradan qaytarib yuborilmaydi. Ushbu davrda nazorat-o‘tkazish punktlari xodimlari tushuntirish ishlarini olib boradi va fuqarolarga yangi tizimdan foydalanish tartibini tushuntiradi.

Ruxsatnomani rasmiylashtirish shartlari va tartibi

Elektron ruxsatnomani olish jarayoni soddalashtirilgan bo‘lib, to‘liq masofaviy formatda (onlayn) amalga oshiriladi:

1. Murojaat muddati: xorijiy fuqaro rejalashtirilgan reys yoki chegaradan o‘tish vaqtidan kamida 72 soat (3 sutka)oldin QazETA rasmiy platformasi orqali ariza yuborishi lozim.

2. Identifikatsiya: anketani to‘ldirish jarayonida ariza beruvchi tizim tomonidan belgilangan shaxsni raqamli identifikatsiya yoki autentifikatsiya qilish tartibidan o‘tadi.

3. Narxi va amal qilish muddati: elektron ruxsatnoma mutlaqo bepul rasmiylashtiriladi — ariza topshirganlik uchun hech qanday davlat boji yoki yig‘im undirilmaydi. Hujjatning amal qilish muddati berilgan kundan boshlab 180 kalendar kunini tashkil etadi.

Ta’kidlash joizki, QazETA ruxsatnomasining mavjudligi mamlakatga kirishni 100 foiz kafolatlamaydi: chegaradan o‘tkazish bo‘yicha yakuniy qaror bevosita nazorat-o‘tkazish punktidagi Chegara xizmati xodimi tomonidan amaldagi qonunchilikka muvofiq qabul qilinadi.

Kimlarga QazETA ruxsatnomasi talab etilmaydi?

E’lon qilingan qoidalarga ko‘ra, quyidagi toifadagi fuqarolar elektron ruxsatnoma olish majburiyatidan ozod qilingan:

• 16 yoshga tolmagan bolalar va o‘smirlar;

• 65 yoshdan oshgan keksa yoshli shaxslar;

• diplomatik va xizmat pasporti egalari;

• Qozog‘iston Respublikasida amal qiluvchi vizaga, yashash guvohnomasiga (VNJ) yoki vaqtincha yashash ruxsatnomasiga (RVP) ega bo‘lgan xorijliklar;

• tranzit yo‘lovchilarning hamda transport vositalari ekipaj a’zolarining ayrim toifalari.

Safarga chiqishdan oldin O‘zbekiston fuqarolariga QazETA rasmiy platformasi orqali amaldagi talablarni va hujjatlar holatini tekshirib olish tavsiya etiladi.