Yaqin Sharqdagi murakkab vaziyatni inobatga olgan holda, O‘zbekiston Tashqi ishlar vazirligi xorijda bo‘lib turgan vatandoshlarimizga tezkor yordam ko‘rsatish va ular bilan aloqani mustahkamlash maqsadida xorijdagi o‘zbekistonliklar uchun maxsus Telegram-bot ni rasman yo‘lga qo‘ydi: @tiv_yordam_bot.
Ushbu raqamli servis diplomatik vakolatxonalar va fuqarolar o‘rtasidagi masofani qisqartirish, shuningdek, favqulodda vaziyatlarda ma’lumot almashinuvini tezlashtirish uchun ishlab chiqilgan. Telegram-bot orqali vatandoshlar konsullik masalalari bo‘yicha o‘zlarini qiziqtirgan savollar va rasmiy murojaatlarni yo‘llashlari mumkin. Shuningdek, tizim fuqarolarga o‘zlarining hozirgi manzili va joriy holati haqidagi ma’lumotlarni real vaqt rejimida taqdim etish imkonini beradi, bu esa zarurat tug‘ilganda ularga manzil bo‘yicha yordam ko‘rsatish yoki evakuatsiya ishlarini tashkil etishda muhim ahamiyat kasb etadi.
Tashqi ishlar vazirligi mazkur yangi kanal ma’lumotlarni yig‘ish va tahlil qilish jarayonini sezilarli darajada tezlashtirishini ta’kidlamoqda. Avvallari bunday murojaatlarni qabul qilish va ularni tizimlashtirish ko‘proq vaqt talab qilgan bo‘lsa, endilikda barcha ma’lumotlar avtomatik tarzda tegishli konsullik xizmatlariga yo‘naltiriladi. Vazirlik mintaqada bo‘lib turgan barcha fuqarolarimizni vahimaga tushmaslikka va diplomatik vakolatxonalar bilan doimiy aloqada bo‘lish uchun ushbu qulay vositadan unumli foydalanishga chaqirmoqda.
