Qirg‘iziston O‘zbekistonning 28 tonna sabzavot mahsulotini ortiga qaytarib yubordi. «Qizil-Qiya avtojolu» nazorat-o‘tkazish punktida O‘zbekistondan olib kelingan 23 tonna piyoz va 5 tonna sabzi markirovkasi yo‘qligi sababli ortiga qaytarildi.
Qirg‘izistondagi «Qizil-Qiya avtojolu» fitosanitariya nazorat postida O‘zbekistondan olib kelingan yirik miqdordagi sabzavot mahsulotlari ortga qaytarildi.
Bu haqda Qirg‘iziston Suv resurslari, qishloq xo‘jaligi va qayta ishlash sanoati vazirligi matbuot xizmati xabar berdi.
Tekshiruv davomida jami 28 tonna mahsulot — 23 tonna piyoz va 5 tonna sabzi solingan qadoqlarda majburiy markirovka yo‘qligi aniqlandi.
«Markirovkasiz karantin ostidagi mahsulotlarni olib kirish Yevroosiyo iqtisodiy ittifoqining (YEOIH) yagona karantin fitosanitariya talablarini buzish hisoblanadi. Shu munosabat bilan yuk mahsulot eksport qilingan mamlakatga qaytarib yuborildi», — deyiladi rasmiy xabarda.
