O‘zbekistondagi yoqilg‘i va gaz quyish shoxobchalarida 46 mingdan ortiq qonunbuzarlik aniqlanib, 464 ta zapravka yopildi. Sentyabrdan cheklovlar kuchayadi.
Vazirlar Mahkamasi qaroriga muvofiq, neft mahsulotlari hamda siqilgan va suyultirilgan gaz sotuvchi jami 6 196 ta ob’yekt tekshiruvdan o‘tkazildi. Taftishlar davomida infratuzilmada jami 46 737 ta jiddiy kamchilik va qonunbuzarlik holatlari fosh bo‘ldi.
Tekshiruv davomida 7 mingdan ortiq muammo joyida hal etilgan bo‘lsa-da, qolgan stansiyalarga nisbatan keskin choralar ko‘rildi. Texnik va yong‘in xavfsizligiga mutlaqo amal qilmagan jami 464 ta avtozapravka (AZS va AGNKSH) faoliyati kamchiliklar butunlay bartaraf etilgunga qadar vaqtincha to‘to’xtatib qo‘yildi.
Shuningdek, hukumat sohani tartibga solish bo‘yicha yangi muddatlarni belgiladi:
-
2026-yil 1-sentyabrdan boshlab muddati o‘tgan yoki ishlab chiqarilgan sanasini aniqlash imkoni bo‘lmagan yuqori bosimli uskunalar bilan ishlash taqiqlanadi.
-
2026-yil sentyabrgacha fuqarolar hayotiga xavf tug‘diruvchi zapravkalarning maxsus reyestri shakllantirilib, ular bosqichma-bosqich xavfsiz hududlarga ko‘chiriladi.
