Kuala-Lumpur — Toshkent reysi bilan uchib kelgan Rossiya fuqarosi samolyot bortida mast holda tartibbuzarlik sodir etib, IIO xodimining qonuniy talablarini bajarmadi. Sud unga 7 sutka ma’muriy qamoq jazosini tayinladi.
Bu haqda Pressa.uz muxbiriga Ichki ishlar vazirligi Aeroportlarda xavfsizlikni ta’minlash boshqarmasi matbuot xizmati ma’lum qildi.
Samolyot bortidagi tartibbuzarlik va qonuniy talablarga bo‘ysunmaslik
Joriy yilning 5-noyabr kuni soat 15:50 larda Islom Karimov nomidagi Toshkent xalqaro aeroportining «Peron» xizmati Toshkent shahri aeroportlarida XTB navbatchilik qismiga xabar berib, X-45-havo kemasi turargohiga xodimlarni chaqirgan.
Aniqlanishicha, «Kuala-Lumpur — Toshkent» yo‘nalishi bo‘yicha NY-552 reysi bilan uchib kelgan Rossiya Federatsiyasi fuqarosi V. M. samolyot bortida spirtli ichimlik iste’mol qilib, mast holatda baqir-chaqir qilgan va yo‘lovchilarning tinchligini buzgan. U samolyotdan tushish vaqtida ham jamoat tartibini buzishni davom ettirib, IIO xodimining qonuniy talablarini bajarishdan bosh tortgan.
Sud qarori
Toshkent shahri aeroportlarida xavfsizlikni ta’minlash boshqarmasi huquqbuzarliklar profilaktikasi inspektorlari tomonidan huquqbuzarga nisbatan O‘zbekiston Respublikasi MJtKning 183-moddasi va 194-moddasi 1-qismi bilan hujjatlar rasmiylashtirildi.
2026-yil 6-noyabr kuni Jinoyat ishlari bo‘yicha Sergeli tuman sudi tomonidan RF fuqarosi V. M. ga nisbatan 7 sutka ma’muriy qamoq jazosi tayinlandi.
Izohlar
Hozircha izohlar yo‘q