Senat tadbirkorlikni qo‘llab-quvvatlash va litsenziyasiz ishlash rejimini joriy etishga qaratilgan ikki muhim qonun loyihasini ma’qulladi. Endi biznesga yangi cheklovlar faqat muhokamadan so‘ng kiritiladi.
Qabul qilingan hujjatlardan biri mamlakatda «litsenziyasiz biznes yuritish» rejimini huquqiy institut sifatida mustahkamlaydi. Bu orqali tadbirkorlar ruxsat etish xususiyatiga ega hujjatlar talab qilinadigan ayrim sohalarda vakolatli organni xabardor qilish yo‘li bilan faoliyatini boshlashlari mumkin bo‘ladi. Maxsus rejim 3 oygacha litsenziyasiz va ruxsatnomalarsiz ishlash huquqini beradi. Bu vaqt ichida kompaniyalar o‘z loyihalarining iqtisodiy samaradorligini test rejimida sinab ko‘rishlari hamda faoliyatlarini rasmiy litsenziya talablariga moslashtirish uchun qo‘shimcha vaqtga ega bo‘lishadi.
Ikkinchi qonun esa tadbirkorlik erkinligi kafolatlarini kuchaytirishga qaratilgan. Endilikda biznesga yangi majburiyatlar, taqiqlar yoki cheklovlar yuklaydigan har qanday normativ-huquqiy hujjat loyihalari albatta tadbirkorlar va ularning birlashmalari ishtirokida muhokama qilinishi shart bo‘ladi. Shuningdek, majburiy talablar reyestriga kiritilmagan qoidalarni bajarmagani uchun biznesni javobgarlikka tortish taqiqlanadi.
Bundan tashqari, xususiylashtirish natijalarini qayta ko‘rib chiqish imkoniyatlari cheklanadi, moliyaviy jarimalarni bo‘lib-bo‘lib yoki kechiktirib to‘lashga ruxsat beriladi hamda biznes uchun imtiyozlar va preferensiyalarning maxsus reyestri yaratiladi. Qonun loyihalari bilan «yashil» texnologiyalar, turizm, ta’lim, sog‘liqni saqlash va ijtimoiy tadbirkorlikni davlat grantlari hamda subsidiyalar orqali qo‘llab-quvvatlash tartiblari ham takomillashtirilmoqda.
