Tatariston rahbari Rustam Minnixanov Nijnekamskdagi PUA hujumida fuqarolari halok bo‘lgan O‘zbekiston va Tojikiston prezidentlariga hamdardlik telegrammasi yo‘lladi. Shavkat Mirziyoyev topshirig‘i bilan maxsus hukumat komissiyasi va ishchi guruh Rossiyaga jo‘natildi.
Tatariston Raisi Rustam Minnixanov Nijnekamsk shahridagi dronlar hujumi oqibatida o‘z fuqarolari halok bo‘lgani munosabati bilan O‘zbekiston Prezidenti Shavkat Mirziyoyev hamda Tojikiston Prezidenti Emomali Rahmonga hamdardlik telegrammalarini yo‘lladi.
10-avgust kuni ertalab Nijnekamskdagi sanoat va fuqarolik ob’yektlariga uyushtirilgan PUA xuruji oqibatida jami 13 kishi hayotdan ko‘z yumdi. Halok bo‘lganlarning 8 nafari O‘zbekiston, bir nafari esa Tojikiston fuqarosi ekani ma’lum qilindi. Rustam Minnixanov o‘z murojaatida vafot etganlarning oila a’zolariga chuqur hamdardlik bildirib, jabrlanganlarga barcha zaruriy yordamlar ko‘rsatilishini ta’kidladi.
Hujum natijasida 70 dan ortiq kishi tibbiy yordam so‘rab murojaat qilgan, ulardan 21 nafari shifoxonalarga yotqizilgan.Yuz bergan mudhish voqea ortidan Rossiya Jinoyat kodeksining 205-moddasi (terrorchilik harakati) bo‘yicha jinoyat ishi qo‘zg‘atildi hamda Tataristonda 10-avgust kuni rasman motam deb e’lon qilindi.
O‘zbekiston Prezidenti Shavkat Mirziyoyev topshirig‘iga binoan Bosh vazir o‘rinbosari Ochilboy Ramatov boshchiligida maxsus Hukumat komissiyasi tuzildi. FVV, TIV, SSV va Migratsiya agentligi vakillaridan iborat ishchi guruh vafot etgan vatandoshlarimizning jasadlarini maxsus reys orqali yurtimizga olib kelish va ularning oilalariga ko‘maklashish choralarini ko‘rmoqda.
