Yo‘l harakatini tashkil etish markazi Sergeli tumanidagi bekatni sport jihozlari bilan ta’minladi. Shahar hokimligi aholidan yangi manzillar bo‘yicha takliflar kutmoqda.
Yo‘l harakatini tashkil etish markazi xabariga ko‘ra, mazkur transport tugunidan jami 12 ta yo‘nalishda harakatlanadigan avtobuslar o‘tadi. Bekat maydonida yo‘lovchilar transport kutish vaqtida yengil mashqlar bajarishi va tortilishi uchun maxsus sport jihozlari o‘rnatilgan.
Markaz ushbu yondashuv shahar infratuzilmasining aholi salomatligi va kundalik farovonligiga xizmat qilayotganining belgisi ekanini qayd etdi. Bunday amaliyot Seul, Pekin, Singapur, Parij, Bogota va Kali kabi jahon shaharlarida ham keng tarqalgan bo‘lib, undan maqsad harakatni kundalik hayotning tabiiy qismiga aylantirishdir. Vorkaut-bekatlar aholi zich joylashgan, serqatnov va kutish hududini xavfsiz ajratish uchun yetarli joyga ega bo‘lgan manzillarda o‘rnatiladi. Poytaxt hokimligi aholi tomonidan tushadigan takliflar asosida yangi manzillarni jihozlashga tayyorligini bildirdi.
Eslatib o‘tamiz, avvalroq Toshkentda bekat maydonlaridan to‘laqonli foydalanish maqsadida do‘konli bekatlar buzib tashlanayotgani ma’lum qilingandi. Ularning o‘rnida qurilayotgan yangi namunaviy bekatlar narxi 20 ming dollargacha yetishi jamoatchilik o‘rtasida muhokamalarga sabab bo‘lgan edi. Mutaxassislarning tushuntirishicha, loyihaning qimmatligi bekatlarning butun bir majmua sifatida qayta qurilishi, ya’ni kutish maydonini kengaytirish, qulay perron, muhandislik ishlari, xavfsizlik uskunalari va raqamli servislarni o‘z ichiga olishi bilan bog‘liqdir.
