Migratsiya agentligi va MXTT xorijdan qaytgan o‘zbekistonliklar uchun 60 mln so‘mgacha grant tanlovini e’lon qildi. Arizalar 21-sentabrgacha qabul qilinadi.
Xorijda mehnat faoliyatini olib borib, O‘zbekistonga qarshiga qaytgan fuqarolarning tadbirkorlik tashabbuslarini qo‘llab-quvvatlash maqsadida grant tanlovi e’lon qilindi. Bu haqda Vazirlar Mahkamasi huzuridagi Migratsiya agentligi matbuot xizmati ma’lum qildi.
Loyihasi Migratsiya agentligi hamda Migratsiya bo‘yicha xalqaro tashkilot (MXTT) hamkorligida, Shvetsiya Adliya vazirligining moliyaviy ko‘magida amalga oshirilmoqda. Tanlovda 2025–2026-yillar davomida xorijda ishlab, vatanga qaytib kelgan O‘zbekiston fuqarolari ishtirok etishlari mumkin. Tashkilotchilar tomonidan xotin-qizlarning loyihadagi faol ishtiroki alohida rag‘batlantiriladi.
Tanlov saralash jarayonida quyidagi mezonlarga alohida ustuvorlik beriladi:
-
Biznesni rivojlantirish bo‘yicha aniq va asoslangan g‘oyaga ega bo‘lish;
-
Yangi ish o‘rinlarini yaratish va aholi bandligini ta’minlash imkoniyati;
-
Taklif etilayotgan yoki mavjud biznesning barqarorligi va moliyaviy samaradorligi.
Saralashdan muvaffaqiyatli o‘tgan g‘oliblar o‘z shaxsiy biznesini yo‘lga qo‘yish yoki kengaytirish uchun 60 million so‘mgacha bo‘lgan grant mablag‘larini qo‘lga kiritadilar. Ishtirok etish uchun arizalar 2026-yilning 21-sentabriga qadar qabul qilinadi.
Izohlar
Hozircha izohlar yo‘q