Prezident xalq qabulxonalari Telegram, Facebook va Instagramda rasmiy sahifalarini ochdi. Endi fuqarolar murojaatlar yoʻllashi va dolzarb tushuntirishlarni ijtimoiy tarmoqlar orqali olishi mumkin.
Ijtimoiy tarmoqlardagi sahifalar orqali foydalanuvchilar nafaqat oʻz murojaatlarini yoʻllashlari, balki xalq qabulxonalarining hududiy boʻlinmalari tomonidan amalga oshirilayotgan ishlar bilan ham tanishib borishlari mumkin.
Shuningdek, platformalarda boshqa fuqarolar murojaatlarining koʻrib chiqilishi jarayonlari, dolzarb masalalar yuzasidan huquqiy tushuntirishlar va foydali tavsiyalar muntazam ravishda eʼlon qilib boriladi.
Ushbu raqamli vositalarning ishga tushirilishi aholining huquqiy xabardorligini oshirish va murojaat qilish mexanizmlarini soddalashtirishga qaratilgan. Rasmiy sahifalar fuqarolarga oʻz huquqlarini himoya qilishda davlat tomonidan yaratilgan imkoniyatlardan samarali foydalanish yoʻllarini tezkorlik bilan oʻrganish imkonini beradi.
Yangi tizim murojaatlar bilan ishlash sifatini nazorat qilishda ham muhim rol oʻynashi kutilmoqda.
