Toshkent shahri Nukus ko‘chasida ko‘p qavatli uyning fasadi yonib ketdii. FVV qutqaruvchilari aholini evakuatsiya qilib, olovni to‘liq o‘chirishdi. Jabrlanganlar yo‘q.
Bugun 13-iyun kuni ertalab poytaxtning Yakkasaroy tumanida favqulodda holat qayd etildi. Soat taxminan 10:20 larda Nukus ko‘chasida joylashgan ko‘p qavatli turar joy binosining fasad (tashqi qoplama) qismida yong‘in kelib chiqdi. FVV qutqaruv guruhlari chaqiruv joyiga bir necha daqiqa ichida yetib borib, olovni o‘chirish harakatlarini boshladi.
Xavfsizlik choralarini ta’minlash maqsadida bino ichidagi barcha aholi zudlik bilan xavfsiz hududga evakuatsiya qilindi. Qutqaruvchilarning tezkor harakatlari natijasida olovning xonadonlar ichiga o‘tib ketishining oldi olindi. Dastlabki ma’lumotlarga ko‘ra, hodisa oqibatida jarohat olganlar yoki qurbonlar yo‘q.
Ko‘rilgan choralar tufayli yong‘in soat 11:00 da qurshab olindi va oradan o‘n daqiqa o‘tib, soat 11:10 larda butunlay o‘chirildi. Vaziyat to‘liq favqulodda xizmatlar nazoratida bo‘ldi. Hozirda mutaxassislar tomonidan yong‘inning kelib chiqish sabablari o‘rganilmoqda.
Izohlar
Hozircha izohlar yo‘q