Tarmoqlarda Rayyona Kids bog‘chasida bolalar ayovsiz kaltaklangani aks etgan video tarqaldi. Tarbiyachiga nisbatan jinoyat ishi qo‘zg‘atildi.
Ijtimoiy tarmoqlarda xususiy maktabgacha ta’lim tashkiloti tarbiyachilari tarbiyalanuvchilarga nisbatan jismoniy kuch ishlatayotgani tasvirlangan video lavha tarqaldi.
Aniqlanishicha, mazkur holat Rayyona Kids xususiy bog‘chasida sodir bo‘lgan bo‘lib, unda 34 yoshli tarbiyachi A. G. bolalarga nisbatan tizimli ravishda jismoniy zo‘ravonlik qilib, shafqatsiz munosabatda bo‘lib kelgan. Hozirda bolalar olgan tan jarohatlarini baholash maqsadida sud-tibbiy ekspertizasi tayinlangan.
Toshkent shahar IIBB bergan ma’lumotga ko‘ra, ushbu holat yuzasidan O‘zbekiston Respublikasi Jinoyat kodeksining 110-moddasi (Qiynash) bilan jinoyat ishi qo‘zg‘atilib, tergov harakatlari olib borilmoqda.
Maktabgacha va maktab ta’limi vazirligi vaziyatni o‘z nazoratiga olganini hamda huquqni muhofaza qilish organlari bilan birgalikda ishchi guruh tuzilganini ma’lum qildi. Vazirlik litsenziya talablariga rioya etmagan va bunday qonunbuzilishlariga yo‘l qo‘ygan bog‘chalarning litsenziyasi bekor qilinishi haqida ogohlantirdi.
