Sergeli tumanida temiryo‘l sozlovchisi A’zam Ibrohimov Qorasuv kanalida oqib ketayotgan o‘smir qizni qutqarib qoldi. “O‘zbekiston temir yo‘llari” rahbariyati xodimni mukofotladi.
“O‘zbekiston temir yo‘llari” AJ matbuot xizmatining xabar berishicha, voqea 9-iyun kuni Toshkent temiryo‘l masofasi korxonasining temiryo‘l sozlovchisi A’zam Ibrohimov o‘zining xizmat vazifasini bajarayotgan vaqtda yuz bergan.
Xodim Sergeli tumani hududidan o‘tuvchi Qorasuv kanali yaqinida ishlayotganida, suvda kuchli oqim bilan oqib ketayotgan va jon achchig‘ida yordam so‘rayotgan ikki nafar qizni ko‘rib qolgan. U zudlik bilan o‘zini suvga tashlab, o‘smir qizni qutqarib qolishga muvaffaq bo‘lgan va unga qirg‘oqda birinchi yordam ko‘rsatgan.
Temiryo‘lchining ushbu fidokorona harakati va ko‘rsatgan jasorati kompaniya rahbariyati tomonidan yuqori baholandi. “O‘zbekiston temir yo‘llari” AJ rahbariyati A’zam Ibrohimovga o‘z minnatdorchiligini bildirib, faxriy tashakkurnoma, esdalik sovg‘alari hamda pul mukofotini tantanali ravishda topshirdi. Eslatib o‘tamiz, may oyi oxirida Qashqadaryoning Kitob tumanida daryoga tushib ketgan bolani qutqargan FVV ofitseri ham vazir tomonidan ko‘krak nishoni bilan mukofotlangan edi.
Izohlar
Hozircha izohlar yo‘q