Toshkentning Olmazor tumanida Islom sivilizatsiyasi markazi oldida rolik uchgan yoshlar sud qilindi. Bir kishiga 10 sutka ma’muriy qamoq, ikki nafariga esa jarima jazosi tayinlandi.
Ijtimoiy tarmoqlarda bir guruh yoshlar va ichki ishlar organlari xodimlari o‘rtasidagi voqea aks etgan videolavha tarqaldi. Toshkent shahar IIBB ma’lumotlariga ko‘ra, hodisa 16-avgust kuni soat 21:00 atrofida Olmazor tumanidagi Islom sivilizatsiyasi markazi yaqinida sodir bo‘lgan.
Bir guruh yoshlar odamlar gavjum bo‘lgan hududda rolik uchishga urinishgan. IIB xodimlari ularni ogohlantirib, bu harakatni to‘xtatishni talab qilishgan, biroq yoshlar xodimlarning qonuniy talablariga bo‘ysunmagan.
Sud hukmi va ma’muriy choralar
Toplangan hujjatlar Olmazor tumani jinoyat ishlari bo‘yicha sudiga yuborildi. Sud qaroriga muvofiq:
-
Fuqarolar Yu. va S. Ma’muriy javobgarlik to‘g‘risidagi kodeksning 183-moddasi (Mayda bezorilik) va 194-moddasi 1-qismi (Ichki ishlar organlari xodimining qonuniy talabiga bo‘ysunmaslik) bo‘yicha aybdor deb topilib, jarimaga tortildi;
-
Fuqaro A. ham ushbu moddalar bo‘yicha aybli deb topilib, 10 sutka ma’muriy qamoq jazosiga mahkum etildi.
Sud majlisidan so‘ng yoshlar sodir bo‘lgan voqeadan xulosa chiqarganliklarini bildirib, o‘z qilmishlaridan afsusda ekanliklarini aytishgan.
IIBB ogohlantirishi
Toshkent shahar IIBB skeytборd, samokat va roliklar uchish uchun maxsus ajratilgan joylar mavjudligini eslatib o‘tdi. Odamlar gavjum maskanlarda bunday harakatlar atrofdagilarga, xususan keksalar, bolalar va turistlarga xavf tug‘dirishi ta’kidlanib, fuqarolar ushbu sport turlari bilan faqat belgilangan joylarda shug‘ullanishga chaqirildi.
