«Uzbekistan Airports» AJ va Saudiya Arabistonining «Vision International Investment» kompaniyasi O‘rta Chirchiq hamda Quyi Chirchiq tumanlarida yangi aeroport qurish bo‘yicha kelishuv imzoladi. Bu haqda O‘zbekiston Respublikasi Transport vazirligi ma’lum qildi.
Yangi zamonaviy aeroport majmuasi Toshkent viloyatining O‘rta Chirchiq va Quyi Chirchiq tumanlari hududida joylashadi. Mazkur ulkan loyiha 1 310 gektar maydonni qamrab oladi.
Vazirlik ma’lumotlariga ko‘ra, loyihaning dastlabki bosqichidayoq qariyb 3 mlrd dollar miqdoridagi to‘g‘ridan-to‘g‘ri xorijiy investitsiyalarni jalb etish ko‘zda tutilgan.
Qurilish ishlarini yakunlash va ob’yektni ishga tushirish 2026–2030-yillarga mo‘ljallangan. Yangi aviahabning barpo etilishi poytaxtning amaldagi aeroporti yuklamasini sezilarli darajada kamaytirish, O‘zbekistonning turizm va tranzit salohiyatini oshirish hamda yo‘lovchilarga xalqaro standartlar darajasida xizmat ko‘rsatish imkonini beradi.
