Royal Jordanian Airlines aviakompaniyasi 30-iyundan boshlab Ammon — Toshkent yo‘nalishida muntazam parvozlarni boshlaydi. Yangi reys ziyorat turizmini rivojlantirishga xizmat qiladi.
O‘zbekiston va Iordaniya poytaxtlari — Toshkent hamda Ammon shaharlari o‘rtasida to‘g‘ridan-to‘g‘ri muntazam aviaqatnovlar yo‘lga qo‘yilmoqda. “Dunyo” axborot agentligi xabariga ko‘ra, parvozlarning ochilishi munosabati bilan Iordaniyada O‘zbekistonning turizm salohiyatiga bag‘ishlangan keng qamrovli taqdimot o‘tkazildi. Unda Iordaniya turizm sohasi yetakchilari, yirik turoperatorlar hamda “Royal Jordanian Airlines” aviakompaniyasi mutasaddilari ishtirok etdi. Arab dunyosi vakillarida mamlakatimizdagi muqaddas qadamjolar hamda ziyorat turizmi uchun yaratilgan sharoitlar katta qiziqish uyg‘otdi.
Dastlabki parvoz ertaga, 30-iyun kuni amalga oshirilishi belgilangan. Ta’kidlash joizki, rasmiy Toshkent yaqin sharq mintaqasi bilan logistika aloqalarini izchil kengaytirmoqda — joriy yilning 18-iyun kuni O‘zbekiston va Iroq rasmiylari ham Bag‘dod — Toshkent yo‘nalishida to‘g‘ridan-to‘g‘ri reyslarni ochish hamda qo‘shma B2B biznes-missiyalarini ko‘paytirish bo‘yicha kelishuvga erishgan edi. Yangi Ammon — Toshkent yo‘nalishining ilk parvoz jadvali tafsilotlari quyidagi jadvalda ko‘rsatilgan.
Izohlar
Hozircha izohlar yo‘q