2026/2027-o‘quv yilidan poytaxtdagi OOTlarda birinchi smena darslari soat 08:00 dan boshlanishi belgilandi. Qaror yo‘llardagi tirbandlikni kamaytirish va transport oqimini tartibga solishga qaratilgan.
Poytaxtdagi oliy ta’lim muassasalarida yangi 2026/2027-o‘quv yilidan e’tiboran o‘quv jarayoni va dars jadvaliga muhim o‘zgartirish kiritilmoqda. Toshkent shahrida joylashgan barcha oliy ta’lim tashkilotlarida birinchi smenadagi o‘quv mashg‘ulotlari rasman soat 08:00 dan e’tiboran boshlanishi belgilandi.
Tegishli qaror talabalar hamda professor-o‘qituvchilar tarkibiga yetkazilib, oliygohlar rahbarlariga yangi tartib bo‘yicha zarur shart-sharoitlarni yaratish topshirildi.
Dars mashg‘ulotlarining vaqtini ertaroqqa surishdan asosiy maqsad — poytaxt yo‘llaridagi transport oqimini samarali boshqarish va tig‘iz vaqtlardagi tirbandliklarni keskin kamaytirishdan iborat.
Ertalabki jamoat transporti hamda ko‘chalardagi yuklamani maqbullashtirish orqali nafaqat talabalar va pedagoglarning qatnovi yengillashtiriladi, balki kunduzgi hamda kechki ta’lim shakllarida tahsil olayotgan talabalarning o‘quv kunini to‘g‘ri rejalashtirish imkoniyati kengayadi.
Oliygohlar ma’muriyati yangi jadvallarni shakllantirish va binolar faoliyatini belgilangan vaqtga moslashtirish choralarini ko‘rmoqda.
