Poytaxtning Amir Temur xiyoboni atrofida haydovchilar uchun svetoforlarning uzluksiz ishlash rejimi yo‘lga qo‘yildi. Bu tirbandlikni kamaytirishga xizmat qiladi.
Yangi mexanizm avtomobillarning to‘xtovsiz harakatlanishiga sharoit yaratadi. Hozircha ushbu qulaylik ikki yo‘nalishda ishlamoqda: Buxoro ko‘chasi kesishmasidan Olay bozori tomon hamda Temuriylar tarixi davlat muzeyi yonidan Buxoro ko‘chasi chorrahasigacha bo‘lgan masofada.
Harakatlanish qoidalari va istiqboldagi rejalar
Svetoforlar bir vaqtning o‘zida emas, balki ma’lum bir vaqt oraliqida ketma-ket yashil chiroqni yoqadi. Bu vaqtOralig‘i yo‘ldagi o‘rtacha tezlikdan kelib chiqib hisoblangan. Tizimdan samarali foydalanish uchun haydovchilardan quyidagilar talab etiladi:
-
Harakatni faqat ruxsat beruvchi ishora yonganda boshlash;
-
Belgilangan tezlik me’yorini buzmaslik va kutilmagan manevrlardan qochish;
-
Oldinda borayotgan transport vositasi bilan xavfsiz masofani saqlash.
Mutaxassislarning ta’kidlashicha, ushbu loyihadan maqsad poytaxt ko‘chalarida poyga o‘tkazish emas, balki avtomobillar oqimini bir maromda ushlab turishdir. Yaqin orada xiyobondan Maxtumquli ko‘chasi tomonga olib chiquvchi yo‘nalish ham ushbu tizimga ulanadi.
