Toshkent shahri hokimi Shavkat Umurzoqov Anhor.uz’ga bergan intervyusida xodimlarning motivatsiyasi va ish grafigi haqida gapirdi. U xodimlardan soat 18:00 da ishdan ketishni va dam olish kunlari ishlamaslikni talab qiladi.
Uning so‘zlariga ko‘ra, u qo‘l ostidagi xodimlardan ish kuni tugashi bilan, ya’ni soat 18:00 da ish joyini tark etishni hamda zarurat bo‘lmasa, shanba va yakshanba kunlari ishga chiqmaslikni talab qiladi.
«Mening qat’iy talabim, masalan, ish kuni tugagach, soat oltida ketishingiz kerak. Qancha ko‘p ish bo‘lmasin, ularning o‘z vaqtida ketishlari uchun bor kuchimni sarflayman. Shu bilan birga, men ularga shanba va yakshanba kunlari ishga chiqmaslikni aytaman», — dedi shahar hokimi.
Xodimlarni rag‘batlantirish va KPI tizimi
Shavkat Umurzoqov xodimlarning ijtimoiy masalalarini hal etish uchun hokimlikda rag‘batlantirish mexanizmlari, jumladan KPI (samadorlikning muhim ko‘rsatkichlari) tizimi joriy etilganini ta’kidladi. Shu bilan birga, u davlat (byudjet) tashkilotida pul bilan rag‘batlantirish imkoniyatlari cheklanganini ochiq tan oldi. «Shuning uchun men pul mukofotlari borasida unchalik muvaffaqiyatga erishdim deb ayta olmayman», — deya ta’kidladi u.
Hokimning qo‘shimcha qilishicha, moddiy rag‘batlantirishning asosiy choralari obodonlashtirish sohasi xodimlariga yo‘naltirilgan — xususan, ularning ish haqini oshirish va pul mukofotlari berishga alohida e’tibor qaratilmoqda.
