Transport vazirligi brutto-shartnomalar shartlariga rioya etilishini tekshirmoqda. Yozgi mavsum munosabati bilan avtobuslarda yo‘lovchilar uchun qulay haroratni saqlash masalasiga alohida e’tibor qaratilmoqda.
Yangi tartibga ko‘ra, tashqi havo harorati +28°C darajadan yuqori bo‘lganda, barcha avtobus va elektrobuslar salonida havo sovutish tizimlari (konditsionerlar) majburiy ravishda ishlashi shart. Shu bilan birga, salon ichidagi harorat barqaror ravishda +26°C daraja darajasida saqlanishi belgilab qo‘yildi.
Transport vazirining tegishli topshirig‘iga asosan, Toshkent shahar transport va yo‘l-transport infratuzilmasini rivojlantirish bosh boshqarmasi boshlig‘i hamda «Toshshaxartransxizmat» AJ boshqaruvi raisi boshchiligidagi maxsus ishchi guruh yo‘nalishlarda doimiy reydlar o‘tkazmoqda. Ular tizimlarning sozligini va talablar bajarilishini bevosita joyida tekshirmoqda. Eslatib o‘tamiz, poytaxt avtobuslarida konditsionerlarni bosqichma-bosqich ishga tushirish joriy yilning 7-mayidan boshlangan edi.
