Rossiya prezidenti Vladimir Putin Mudofaa va Tashqi ishlar vazirliklariga O‘zbekiston bilan 2017-yildan buyon amal qilib kelayotgan harbiy-texnik hamkorlik to‘g‘risidagi shartnomaga o‘zgartirish kiritish bo‘yicha muzokaralar o‘tkazishga ruxsat berdi.
Ushbu poydevor hujjat nafaqat Rossiyadan O‘zbekistonga qurol-yarog‘ va harbiy texnikalarni sotishni, balki harbiylashtirilgan mahsulotlar, ehtiyot qismlar, texnologiyalar hamda ta’mirlash xizmatlarini ikki tomonlama (o‘zaro)yetkazib berishni tartibga soladi.
Amaldagi kelishuvlar O‘zbekiston qurolli kuchlari ixtiyoridagi aviatsiya, zirhli texnikalar va havo mudofaasi tizimlariga xizmat ko‘rsatish va ularni modernizatsiya qilishni ham qamrab oladi. Shuningdek, hujjat ilmiy-tadqiqot ishlarini birgalikda olib borish, texnologik hujjatlar bilan almashish va harbiy mutaxassislarni tayyorlash bo‘yicha huquqiy bazani yaratgan.
Bitimni o‘zgartirish jarayoni Rossiya harbiy-sanoat majmuasiga qarshi kiritilgan xalqaro sanksiyalar fonida kechmoqda. AQSH, Yevropa Ittifoqi, Buyuk Britaniya va Yaponiya Rossiyaga harbiy hamda ikki xil maqsadda ishlatiladigan 50 dan ortiq mahsulot turlari, jumladan mikrosxemalar, optika, navigatsiya uskunalari va dronlar uchun butlovchi qismlar eksportini taqiqlagan. G‘arb nazorat organlari ushbu mahsulotlarning uchinchi mamlakatlar orqali Rossiyaga kirib borish xavfini doimiy kuzatib bormoqda.
Shu munosabat bilan Moskva shartnoma matnini yangi logistik va iqtisodiy voqelikka moslashtirishga urinmoqda. Bu o‘zgartirishlar sanoat kooperatsiyasini chuqurlashtirish, O‘zbekiston hududida qo‘shma servis markazlarini tashkil etish hamda tomonlarni ikkilamchi sanksiyalar xavfidan himoyalashga qaratilgan bo‘lishi mumkin.
Ko‘p vektorli tashqi siyosat yurituvchi O‘zbekiston uchun bu masala o‘ta mas’uliyatli hisoblanadi. Mamlakat rasmiylari milliy armiya jangovar shayligini saqlash bilan birga, mahalliy korxona va banklarni xalqaro sanksiyalar ostida qolishidan himoyalash uchun ikki xil maqsadga mo‘ljallangan tovarlar eksporti ustidan qat’iy nazorat o‘rnatgan.
