Rossiya hukumati ichki bozordagi yonilg‘i inqirozi va taqchillik sababli benzin eksportiga qo‘yilgan taqiqni 2026-yil oxirigacha uzaytirishga qaror qildi. Chetga yonilg‘i sotishni cheklash qarori ishlab chiqaruvchi zavodlarga ham taalluqli bo‘ladi.
Rossiya hukumati mamlakatdan benzin eksport qilishga kiritilgan taqiqni 2026-yilning oxirigacha uzaytirdi. Bu haqda Rossiya Bosh vaziri o‘rinbosari Aleksandr Novakka tayanib «Interfaks» xabar bermoqda.
Hukumat shtabi yig‘ilishida qabul qilingan qarorga ko‘ra, ushbu cheklov benzin ishlab chiqaruvchi neftni qayta ishlash zavodlari uchun ham, uni ishlab chiqarmaydigan yoqilg‘i kompaniyalari uchun ham birdek amal qiladi. Dizel yoqilg‘isi eksportiga qo‘yilgan taqiq esa ichki bozor to‘liq ta’minlanishi va barqarorlashuviga qarab bosqichma-bosqich bekor qilinishi rejalashtirilmoqda.
Avvalroq Rossiyada logistika tizimidagi uzilishlar va harbiylashtirilgan mojarolar doirasida neftni qayta ishlash zavodlariga berilgan zarbalar ortidan jiddiy yonilg‘i inqirozi yuzaga kelgani xabar qilingan edi. Vaziyatni barqarorlashtirish maqsadida hukumat dastlab 2026-yil 1-apreldan benzin, 8-iyuldan esa dizel eksportini vaqtincha cheklagan edi. 31-iyulda yakunlanishi kerak bo‘lgan benzin taqiqi endilikda yil oxirigacha uzaytirildi.
Ichki bozordagi taqchillikni yopish maqsadida Rossiya Qozog‘istondan 50 ming tonna Ai-92 markali benzin sotib olish hamda Hindistondan dengiz yo‘li orqali yoqilg‘i import qilishni boshlagan. Yoqilg‘i tanqisligi Rossiyaning 64 dan ortiq hududini va bilvosita Markaziy Osiyo mamlakatlarini ham qamrab olmoqda.
Izohlar
Hozircha izohlar yo‘q