Ekologiya va iqlim o‘zgarishi qo‘mitasi raisi maslahatchisi Rasul Kusherbayev Toshkent hokimi Shavkat Umurzakov va poytaxt hokimiyati faoliyatini keskin tanqid qildi.
U video murojaat e’lon qilib, Toshkent rahbariyati faoliyati Konstitutsiya tamoyillariga zid ekanini va fuqarolar ishonchiga putur yetkazayotganini ta’kidladi.
Sobiq deputatning fikricha, poytaxtdagi ayrim qarorlar tadbirkorlar hisobidan daromad olishga qaratilgan bo‘lib, aholi manfaatlari yetarli darajada inobatga olinmayapti.
Kusherbayevning aytishicha, shaharda ko‘plab xususiy mulk obyektlari, jumladan do‘kon-bekatlar va elektromobil quvvatlash stansiyalari sud qarorisiz buzilayotgani kuzatilmoqda.
Shuningdek, u Toshkentni “yashil shahar”ga aylantirish haqidagi va’dalar amalda bajarilmayotganini qayd etdi. Uning ta’kidlashicha, daraxtlarning kesilishi va rekreatsiya hududlarining qurilish uchun ajratilishi havo sifatining yomonlashishiga hamda aholida allergik kasalliklar ko‘payishiga olib kelmoqda.
Sobiq deputat ayrim tashabbuslar — pullik avtoturargohlar, reklama yozuvlari uchun soliqlar va boshqa to‘lovlar — “xalq manfaatlari” nomi ostida joriy etilayotganini aytdi.
Kusherbayevning fikricha, bunday qarorlar jamiyat va investorlar orasida ishonchni kamaytirishi mumkin.
U boshqaruv tizimidagi muammolardan chiqish yo‘li sifatida hokimlarni to‘g‘ridan-to‘g‘ri saylash tizimini joriy etishni taklif qildi. Uning ta’kidlashicha, rahbarlarning saylovchilar oldida hisobdor bo‘lishi fuqarolar manfaatlarini hurmat qiladigan boshqaruvni shakllantirishga yordam beradi.
Izohlar
Hozircha izohlar yo‘q