Qashqadaryoda bog‘chaning beparvoligi sabab 3 yoshli bola vafot etdi. Bolani qulflangan avtomobilda unutib qoldirishgan, holat yuzasidan jinoiy ish ochilib, haydovchi qo‘lga olindi.
Voqea 4-iyun kuni Kasbi tumani “Zafar” mahallasida joylashgan, YaTT “O. A.”ga qarashli oilaviy nodavlat bog‘chada sodir bo‘lgan. 3 yoshli tarbiyalanuvchi xodimlarning e’tiborsizligi oqibatida avtomobil salonida qolib ketgan va issiq havo hamda havo yetishmasligi natijasida vafot etgan.
Vazirlik rasmiylarining bildirishicha, mazkur bog‘cha rahbariyati bolalarni transportda tashish xavfsizligi qoidalariga rioya qilish bo‘yicha avval ham bir necha bor ogohlantirilgan. Biroq talablarga amal qilinmagani sababli fojia yuz bergan.
Mazkur holat yuzasidan Jinoyat kodeksining 116-moddasi (Kasb yuzasidan o‘z vazifalarini lozim darajada bajarmaslik) bilan jinoyat ishi qo‘zg‘atildi. Tergov doirasida gumonlanuvchi tariqasida avtomobil haydovchisi hibsga olingan.
Shuningdek, tadbirkor bilan tuzilgan shartnoma vazirlik tomonidan bekor qilindi. Vazirlik mutasaddilari fojiaga aloqador barcha shaxslarga qat’iy choralar ko‘rilishini ma’lum qildi. Shu bilan birga, ota-onalar farzandlarining bog‘chaga borib-kelish xavfsizligini shaxsan nazorat qilishga va ularning hayotiga befarq bo‘lmaslikka chaqirildi.
Izohlar
Hozircha izohlar yo‘q