Markaziy bank 2026-yil may oyi uchun xizmatlar sohasi statistikasini e’lon qildi. Shaxsiy transportni sug‘urtalash narxi yil davomida 281,8 foizga oshgan. Shuningdek, chiqindi va suv tariflari ham ko‘tarilgan.
Markaziy bankning hisobotiga ko‘ra, ushbu yo‘nalishdagi narxlar o‘tgan yilning mos davriga nisbatan birdaniga 281,8 foizga oshgan va xizmatlar sohasidagi o‘sish bo‘yicha mutloq yetakchiga aylangan.
Sug‘urtadan tashqari, aholi uchun boshqa bir qator xizmatlar narxi ham sezilarli darajada oshgan. Xususan, trolleybus yo‘l haqi biletlari ikki barobarga (+100%), maishiy chiqindilarni olib chiqish xizmati 28 foizga, haydovchilik maktablarida o‘qish 22,9 foizga hamda sovuq suv ta’minoti tariflari 22,4 foizga ko‘tarilgan.
Shu bilan birga, tahlillar ayrim ommabop xizmatlar arzonlashganini ham ko‘rsatdi. Xalqaro aviaqatnovlar chiptalari narxi 7,7 foizga, ichki reyslar 4 foizga, pul o‘tkazmalari uchun undiriladigan komissiya to‘lovlari esa 7,6 foizga pastlagan. Nodavlat oliy ta’lim muassasalarida o‘qish shartnoma pullari 0,5 foizga, mikroqarz xizmatlari esa 0,02 foizga kamaygan. Umuman olganda, mamlakatda xizmatlar inflyatsiyasi barqaror darajada qolmoqda: iste’mol narxlari indeksi savatchasiga kiruvchi 98 ta xizmat turidan 75 tasida (ya’ni 77 foizida) yillik narx o‘sishi 10 foizlik ko‘rsatkichdan oshmagan.
Izohlar
Hozircha izohlar yo‘q