Adliya vazirligi nobud bo‘lgan hayvonlar jasadini krematsiya qilish nizomini davlat ro‘yxatidan o‘tkazdi. Yangi tartibga ko‘ra, biologik qoldiqlarni maxsus pechlarda yondirish hamda jasadlarni tashish qoidalari belgilandi.
Yangi tartibga ko‘ra, biologik qoldiqlarni maxsus texnik uskunalar (krematoriy) yordamida to‘liq yo‘q qilish tartib-taomillari joriy etiladi.
Hujjatga muvofiq, hayvon o‘limi aniqlangan taqdirda uning egasi yoki jasadni topgan shaxs o‘sha kunning o‘zida mas’ul idoralarga xabar berishi shart. Hayvon qoldiqlari faqat maxsus transport vositalari yoki yopiq konteynerlarda krematoriyga yetkaziladi. Ularni ochiq holda tashish yoki saqlash qat’iyan man etiladi. Jasadlar yoqilgunga qadar maxsus xonalarda saqlanadi va bu muddat 24 soatdan oshmasligi lozim. Yuqumli kasalliklar aniqlangan yoki o‘lim sababi noma’lum bo‘lgan barcha holatlarda krematsiya jarayoni majburiy tartibda amalga oshiriladi.
Yangi nizomda sanitariya va xavfsizlik choralariga alohida urg‘u berilgan. Krematsiyadan so‘ng qolgan kul va qoldiqlar tegishli tartibda yo‘q qilinib, dalolatnoma rasmiylashtiriladi. Jarayonga jalb qilingan barcha xodimlar maxsus kiyim-bosh, poyabzal, bir martalik qo‘lqop, niqob yoki respirator hamda himoya ko‘zoynaklari bilan bepul ta’minlanadi. Shuningdek, hayvon jasadi tekkan barcha uskunalar va joylar majburiy ravishda dezinfeksiya qilinishi shart.
