O‘zbekistonda narkotiklar aylanmasiga qarshi yangi qonun qabul qilindi. Narkojinoiyatlar uchun 20 yilgacha qamoq, jamoat joyida iste’mol qilganlarga esa 15 sutkagacha qamoq jazosi beriladi.
O‘zbekistonda gilyohvandlik vositalari, psixotrop va kuchli ta’sir qiluvchi moddalarning qonunga xilof muomalasiga qarshi kurashishni tubdan kuchaytirishga qaratilgan va jinoyat qonunchiligini keskinlashtiruvchi yangi qonun qabul qilindi. Jinoyat kodeksiga aholi salomatligi va millat genofondiga qarshi jinoyatlar bo‘yicha alohida bobning kiritilishi ushbu xavfga davlat darajasida jiddiy va murosasiz qaralayotganidan dalolat beradi.
Yangi normalarga ko‘ra, qator o‘ta og‘ir narkojinoiyatlar bo‘yicha sudlanganlar uchun shartli ravishda muddatidan ilgari ozod qilish (UDO) yoki jazoni yengilrog‘iga almashtirish imkoniyati mutlaqo bekor qilindi.
Endilikda eng og‘ir turdagi narkojinoiyatlar, jumladan, noqonuniy narkolaboratoriyalar tashkil etish, yirik miqdordagi savdo hamda transmilliy jinoiy guruhlarga a’zolik uchun 15 yildan 20 yilgacha ozodlikdan mahrum qilish jazosi tayinlanadi.
Xuddi shunday qat’iy chora narkojinoiyatlarni yashirgan, ularni homiylik qilgan yoki fosh etilishiga to‘sqinlik qilgan mansabdor shaxslarga ham tatbiq etilib, ularga ham 20 yilgacha qamoq jazosi berilishi belgilandi. Bundan tashqari, jamoat joylarida giyohvandlik, psixotrop yoki kuchli ta’sir qiluvchi moddalarni iste’mol qilganlik uchun 15 sutkagacha ma’muriy qamoq jazosi joriy etilmoqda.
Qonunda yoshlar xavfsizligini ta’minlash va internet orqali tarqatiladigan xavflarga qarshi kurashishga alohida e’tibor qaratilgan. Narkotiklarni internet tarmog‘i orqali, maktab, kollej, OTM, talabalar turar joylari, bolalar lagerlari yoki ularga tutash hududlarda tarqatganlik uchun 5 yildan 10 yilgacha qamoq jazosi beriladi.
Voyaga yetmaganlarni giyohvandlikka jalb etish, kuchli ta’sir qiluvchi moddalarni ularga sotish og‘irlashtiruvchi holat deb baholanadi, agarda ushbu qilmish inson o‘limiga yoki boshqa og‘ir oqibatlarga olib kelsa, aybdorlar 10 yilgacha ozodlikdan mahrum etiladi.
