Qonunchilik palatasi Mehnat kodeksiga o‘zgartirishlarni ma’qulladi. Endi ish joyida tegajog‘lik hamda xodimlarni teri rangi yoki siyosiy qarashlari sababli kamsitish qonunan man etiladi.
Ushbu islohot xalqaro mehnat standartlarini milliy qonunchilikka joriy etish hamda ish joylarida xavfsiz muhit yaratish maqsadida ishlab chiqilgan.
Yangi normalarga ko‘ra, Mehnat kodeksiga “xarassment” (tegajog‘lik va tazyiqlar) tushunchasi kiritilib, unga nisbatan qat’iy taqiq belgilanmoqda. Shuningdek, xodimlarni kamsitish taqiqlanadigan holatlar ro‘yxati kengaytirilib, unga “siyosiy qarashlar” hamda “teri rangi” kabi yangi mezonlar qo‘shildi. Endilikda ish beruvchilar xodimlarni ushbu belgilar bo‘yicha kamsitishga haqli emas.
Deputatlarning fikricha, ushbu qonuniy choralar mehnat munosabatlarida fuqarolarning sha’ni va qadr-qimmatini muhofaza qilishni yangi bosqichga olib chiqadi. Bu o‘zgarishlar nafaqat ichki mehnat bozoridagi nizolarni kamaytiradi, balki O‘zbekistonning xalqaro maydondagi ijobiy nufuzini yanada mustahkamlaydi.
