O‘zgidromet joriy ish haftasi uchun ob-havo prognozini e’lon qildi. Respublika bo‘ylab havo harorati +30…+35 darajagacha pasayadi, ayrim hududlarda chang-to‘zonlar kuzatiladi.
O‘zgidromet xizmati agentligi xabariga ko‘ra, respublikaning katta qismida kunduzgi havo harorati +30…+35 daraja atrofida bo‘ladi, faqatgina janubiy viloyatlarda issiq ko‘rsatkichlar +37 darajagacha saqlanib qoladi. Harorat pasayishi kuchli shamol, shimol va cho‘l zonalarida 20–22 m/s gacha kuchayuvchi chang-to‘zonlar hamda tog‘ oldi hududlarida sel kelishi xavfi bilan kuzatiladi.
Poytaxtda ham joriy haftada harorat pasayishi va shamol kuchayishi kutilmoqda. Dushanba va seshanba kunlari kunning ikkinchi yarmida Toshkentda qisqa muddatli yomg‘ir yog‘ishi va momoqaldiroq bo‘lishi mumkin, seshanba kuni esa havo harorati +30…+32 darajagacha tushadi. 1–3-iyul kunlari poytaxtda asosan yog‘ingarchiliksiz ob-havo hukmron bo‘ladi, faqat payshanba kuni qisqa muddatli yomg‘ir yog‘ishi ehtimoli bor. Dushanba, seshanba va payshanba kunlari poytaxtda shamol tezligi 12–15 m/s gacha kuchayib, chang g‘uborlari ko‘tarilishi mumkin.
