Qozog‘iston Senati “Sirdaryo — Malik” va “Selinniy — Oq oltin” bojxona punktlari maqomini o‘zgartirish haqidagi bayonnomani ratifikatsiya qildi. Tafsilotlar.
Shuningdek, ushbu chegara o‘tish joylari faqat yengil avtotransport vositalari uchun belgilangan cheklovlardan xalos bo‘lib, yuk va yo‘lovchi tashish maqomiga ega bo‘ladi. Infratuzilmani yangilash va qoidalarni o‘zgartirishdan ko‘zlangan asosiy maqsad ikki davlat o‘rtasidagi yo‘lovchi hamda transport oqimini teng taqsimlash, tirbandliklarning oldini olishdan iborat.
Hujjatga muvofiq, “Selinniy — Oq oltin” o‘tkazish punktidan yengil va yuk tashimaydigan bo‘sh yuk mashinalari bilan bir qatorda katta hajmli hamda og‘ir vaznli yuklar, tijorat tovarlari o‘tishiga ruxsat beriladi. “Sirdaryo — Malik” nazorat-o‘tkazish punktidan esa faqat yengil va yuk xatiga ega bo‘lmagan bo‘sh yuk avtomobillari o‘ta oladi, bu yerda tijorat maqsadlarida yuk va tovarlarni o‘tkazish taqiqlanadi.
Ma’lumot o‘rnida, O‘zbekiston qo‘shni davlatlar bilan chegara yo‘laklarini ochish va ish vaqtini uzaytirish choralarini faol davom ettirmoqda. Xususan, joriy yilning may oyidan boshlab Qirg‘iziston bilan chegaradagi “Qadamjoy — avtoyo‘l”, “Chashma — avtoyo‘l” va “Oqqiya — avtoyo‘l” nazorat-o‘tkazish punktlari ham tun-u kun ishlash rejimiga o‘tkazilgan edi. Sayyohlik mavsumida fuqarolarga qulaylik yaratish maqsadida joriy etilgan ushbu 24 soatlik tartib 2026-yilning 1-oktyabrigacha amal qiladi va bu punktlardan faqatgina O‘zbekiston hamda Qirg‘iziston fuqarolarigina foydalanishlari mumkin.
URL: qozogiston-va-o-zbekiston-chegarasidagi-ikkita-punk
Izohlar
Hozircha izohlar yo‘q