Ekvador terma jamoasining E guruhida Germaniya ustidan 2:1 hisobida qozongan g‘alabasidan keyin O‘zbekiston milliy terma jamoasining jahon chempionati pley-off bosqichiga chiqish imkoniyatlari sezilarli darajada yomonlashdi.
Ushbu g‘alaba evaziga 4 ochko jamg‘argan Ekvador o‘z guruhida uchinchi o‘rinni egalladi va uchinchi o‘rinni olgan eng yaxshi jamoalar reytingida yuqoriga ko‘tarildi, bu esa 1/16 final yo‘llanmalari uchun kurashni yanada keskinlashtirdi. Amaldagi reglamentga ko‘ra, har bir guruhdan dastlabki ikki o‘rinni egallagan jamoalar, shuningdek, uchinchi o‘rinni band etganlar orasidagi eng yaxshi 8 ta telerma jamoa pley-offga yo‘l oladi.
Kolumbiya va Portugaliyadan uchralgan mag‘lubiyatlardan keyin biror ochko ishlay olmagan O‘zbekiston K guruhida dastlabki ikki o‘rindan birini qo‘lga kiritish imkoniyatidan butunlay mahrum bo‘ldi. Endilikda Fabio Kannavaro shogirdlari oldida faqat bitta yo‘l qoldi — so‘nggi turda DR Kongo terma jamoasini mag‘lub etish va boshqa guruhlardagi natijalarni kutish. Mavjud vaziyatdan kelib chiqilsa, eng yaxshi uchinchi o‘rinlar qatoriga kirish va to‘plar nisbatini yaxshilash uchun O‘zbekiston raqibini kamida to‘rtta gol farqi bilan yirik hisobda yutishi talab etiladi.
DR Kongo terma jamoasi ikki turdan keyin 1 ochkoga ega bo‘lib turibdi: ular Portugaliya bilan durang o‘ynab, Kolumbiyaga imkoniyatni boy bergan. Mazkur bahs oldidan kongo`liklar bosh murabbiyi Sebastyen Desabr jamoasiga durang natija yetarli bo‘lmasligini va Kolumbiyadan uchralgan mag‘lubiyatdan keyin tavakkal qilishga majburligini ma’lum qildi. O‘zbekiston hamda DR Kongo o‘rtasidagi taqdirni hal qiluvchi o‘yin 28-iyun kuni Atlantada bo‘lib o‘tadi. Uchrashuv Toshkent vaqti bilan tonggi soat 04:30 da start oladi.
Izohlar
Hozircha izohlar yo‘q