Korrupsiyaga qarshi kurashish agentligi davlat xizmatchilarini qamoqxonalarga ekskursiya tashkil qildi. Amaldorlarga mahbuslar hayoti ko‘rsatildi va pora bilan qo‘lga tushganlar bilan suhbat tashkil etildi.
Antikorrupsiya agentligining ma’lum qilishicha, bunday keskin chora 2026-yilga mo‘ljallangan rasmiy ish rejasiga kiritilgan. Kabinetlardagi zerikarli ma’ruzalardan voz kechib, amaldorlarga haqiqiy qamoqxona hayoti ichkaridan ko‘rsatildi: ular tergov xonalari va mahbuslar saqlanayotgan kameralarni o‘z ko‘zlari bilan ko‘rib chiqishdi.
Tashrifning eng ta’sirli qismi korrupsiyaviy jinoyatlari uchun panjara ortida o‘tirgan sobiq hamkasblar bilan uchrashuv bo‘ldi. Bugungi kunda jazo muddatini o‘tayotgan mahkumlar kelgan amaldorlarga birgina noto‘g‘ri qadam, nafs va oson pul topish istagi qanday qilib ularni mansabdan ayirgani, obro‘sini to‘kkani va oilalarini baxtsiz qilganini ochiq-oydin so‘zlab berishdi.
Tashkilotchilarning ishonchi komilki, bunday uchrashuvlar har qanday jarimadan ko‘ra samaraliroq ta’sir qiladi. Ular poraning evazi nafaqat qamoq jazosi, balki butun hayotning barbod bo‘lishi ekanini yaqqol isbotlamoqda. Agentlik yaqin orada bunday majburiy ekskursiyalarni boshqa vazirliklar, ayniqsa, moliyaviy xavf yuqori bo‘lgan sohalar uchun ham tashkil etishni va’da qildi.
Eslatib o‘tamiz, davlat qonunchilikni ham jiddiy ravishda qat’iylashtirmoqda. Avvalroq Senat tomonidan ma’qullangan qonun loyihasiga ko‘ra, korrupsiya bilan qo‘lga tushgan shaxslar endi muddatidan oldin shartli ravishda ozodlikka (UDO) chiqish huquqidan mahrum etiladi.
