Transport vazirligi 17-avgust kuni avtobusda chiptasiz yurganlik uchun jarimalarni 1 BHMgacha oshirishni taklif qildi. 1-sentyabrdan esa avtobusga kirishda yo‘l haqini darhol to‘lash tartibi joriy etiladi.
Transport vazirligi jamoat transportida chiptasiz yurganlik uchun javobgarlikni kuchaytirish bo‘yicha takliflar paketini tayyorlab, Qonunchilik palatasiga kiritdi. Hujjatga ko‘ra:
-
Birinchi marta yo‘l haqini to‘lamaganlik uchun — 0,5 BHM (220 ming so‘m);
-
Takroran sodir etilgan huquqbuzarlik uchun — 1 BHM (440 ming so‘mgacha) jarima solish taklif etilmoqda.
1-sentyabrdan kirishda darhol to‘lov qilish tartibi
Vazirlar Mahkamasining 2026-yil 3-iyundagi 276-sonli qaroriga muvofiq, 2026-yil 1-sentyabrdan e’tiboran brutto-kontrakt tizimida ishlaydigan barcha shahar avtobuslarida yo‘lovchilar yo‘l haqini salonga kirishlari bilan darholto‘lashlari shart bo‘ladi. To‘lovni transport yoki ijtimoiy kartalar, bank kartalari, smartfon hamda boshqa kontaktzsiz usullar orqali validatorda tasdiqlash mumkin.
To‘lovni amalga oshirmagan yoki imtiyozini tasdiqlamagan shaxs chiptasiz yo‘lovchi hisoblanadi. Nazoratchilar to‘lov faktini maxsus planshetlar yordamida tekshiradilar.
Ma’lumotlarga ko‘ra, 2026-yilning dastlabki yetti oyida 82 mingdan ortiq chiptasiz yo‘lovchi aniqlanib, ulardan 2 milliard so‘mdan ziyod jarima undirilgan. Yangi tartib yo‘lovchilar oqimini aniq hisobga olish, naqd pulga qaramlikni kamaytirish va elektron to‘lov madaniyatini rivojlantirishga xizmat qiladi.
