Nepaldagi suv toshqinlarida halok bo‘lganlar va jabrlanganlar orasida o‘zbekistonliklar yo‘q. O‘zbekistonning Dehlidagi elchixonasi vaziyatni nazorat qilmoqda.
Nepal va Tibet chegarasida yuz bergan halokatli suv toshqinlari ile loy ko‘chkilari oqibatida halok bo‘lganlar va jabrlanganlar orasida O‘zbekiston fuqarolari mavjud emas. Bu haqda O‘zbekistonning Dehlidagi (bir vaqtning o‘zida Nepalda ham faoliyat yurituvchi) elchixonasi ma’lumotiga tayanib «Dunyo» AA xabar berdi. Diplomatik vakolatxona mahalliy idoralar bilan doimiy aloqada bo‘lib, vaziyatni diqqat bilan kuzatib bormoqda. Tabiiy ofat 26-avgust kuni Bxote-Koshi daryosida, taxminan 4,4 magnitudali zilzila va uning ortidan kelib chiqqan ko‘chki daryo o‘zanini to‘sib qo‘yishi sababli boshlangani aytilmoqda.
So‘nggi ma’lumotlarga ko‘ra, Nepaldagi toshqinlar va vayronagarchiliklar oqibatida kamida 165 kishi halok bo‘lgan. Shuningdek, Nepal va Tibet hududida 1,5 mingga yaqin kishi, jumladan, 700 dan ortiq xorijlik sayyoh hamda ziyoratchilar bedarak yo‘qolgan deb hisoblanmoqda. Hududda 5 mingdan ziyod harbiy va politsiya xodimlari qidiruv-qutqaruv ishlariga jalb etilgan. Qutqaruv operatsiyasiga tinimsiz yog‘ayotgan yomg‘irlar hamda takroriy ko‘chki xavfi jiddiy xalaqit bermoqda.
