Telegram’da davlat organlari va ularning rahbarlari nomidan soxta akkauntlar yaratilmoqda. Istiqbolli loyihalar milliy agentligi fuqarolarni ogohlikka chaqirdi.
Istiqbolli loyihalar milliy agentligi (NAPP) Telegram messenjerida fuqarolarning pul mablag‘larini o‘zlashtirishga qaratilgan yangi va xavfli firgarlik sxemasi aniqlangani haqida rasmiy ogohlantirish bilan chiqdi.
Keltirilgan ma’lumotlarga ko‘ra, jinoyatchilar soxta akkauntlar va maxsus Telegram-botlar yaratib, ularni davlat organlari — NAPP, Markaziy bank, Korrupsiyaga qarshi kurashish agentligi va boshqa idoralarning, shuningdek, ushbu tashkilotlar rahbarlari hamda xodimlarining rasmiy sahifalari sifatida taqdim etmoqda.
Jabrlanuvchilarni aldash uchun firgarlar rasmiy ramzlar, logotiplar va mansabdor shaxslarning fotosuratlaridan foydalanishmoqda. Shundan so‘ng, go‘yoki qandaydir tekshiruv yoki surishtiruvlar o‘tkazilayotgani haqida xabarlar yuborilib, fuqarolar davlat organlari bilan hamkorlik qilishga ko‘ndiriladi.
Muloqot davomida firgarlar psixologik bosim o‘tkazib, ijtimoiy muhandislik usullari va soxta hujjatlar orqali fuqarolarni o‘z nomlariga onlayn-kredit rasmiylashtirishga majburlashadi va olingan pullarni o‘zlashtirib yuborishadi. Ushbu sxemaning asosiy xususiyati shundaki, barcha muloqotlar faqat Telegram orqali yuritiladi va qo‘ng‘iroqlar yashirin yoki shubhali raqamlardan amalga oshiriladi.
Agentlik NAPP xodimlari fuqarolar va tadbirkorlar bilan faqat rasmiy aloqa kanallari — xizmat telefonlari, rasmiy elektron pochta va pochta jo‘natmalari orqali bog‘lanishini alohida ta’kidladi. Telegram’dagi anonim akkauntlar orqali hech qanday rasmiy muloqot olib borilmaydi.
Firgarlar tuzog‘iga tushib qolmaslik uchun NAPP quyidagilarga amal qilishni tavsiya etadi:
-
shubhali havolalarga kirmaslik va noma’lum fayllarni (ayniqsa, .apk kengaytmali ilovalarni) yuklab olmaslik;
-
noma’lum va yashirin raqamlardan bo‘ladigan qo‘ng‘iroqlarga javob bermaslik;
-
davlat organlari akkauntlarining haqiqiyligini faqat ularning rasmiy veb-saytlari orqali tekshirish;
-
shubhali xabarlarning skrinshotlarini saqlab qolish, firgarlarni bloklash va bunday holatlar haqida zudlik bilan huquqni muhofaza qilish organlariga xabar berish.
