Prezident Xorijiy investorlar kengashi yig‘ilishida milliy terma jamoamizning Kolumbiyaga qarshi (1:3) o‘yini haqida gapirib, futbolchilarning kuchli xarakter ko‘rsatganini e’tirof etib qo‘llab-quvvatladi.
Davlatimiz rahbari Jahon chempionatidagi tarixiy ilk uchrashuvida Kolumbiyaga 1:3 hisobida imkoniyatni boy bergan futbol bo‘yicha O‘zbekiston milliy terma jamoasiga dalda berdi. Shavkat Mirziyoyev bu haqda Xorijiy investorlar kengashining yalpi majlisida gapirib o‘tdi.
Prezident juda tajribali raqibga qarshi kechgan bahsda o‘zbekistonlik futbolchilarning ko‘rsatgan matonati va fidoyiligini yuqori baholadi. Davlat rahbarining ta’kidlashicha, o‘yin murakkab kechganiga qaramay, yigitlar oxirigacha kurashish va g‘alabaga bo‘lgan intilishlarini namoyish eta olishgan.
«Futbolchilarimiz juda tajribali jamoaga qarshi kechgan uchrashuvda kuchli xarakter ko‘rsatishdi. Biz uchun Jahon chempionatidagi birinchi gol — bu ham bir g‘alaba», — dedi Prezident.
Eslatib o‘tamiz, O‘zbekistonning jahon birinchiliklaridagi tarixiy dastlabki goliga uchrashuvning 60-daqiqasida yarim himoyachi Abbosbek Fayzullayev mualliflik qildi. Startdagi muvaffaqiyatsizlikka qaramay, davlat rahbarining ushbu e’tirofi terma jamoamiz a’zolariga 23-iyun kuni Portugaliyaga qarshi bo‘ladigan hal qiluvchi bahs oldidan qo‘shimcha kuch bag‘ishlashi shubhasiz.
Izohlar
Hozircha izohlar yo‘q