Mahkum ayollar qamoqxonaning o‘zida oliy ta’lim olishlari mumkin bo‘ladi. Prezident «Yangi hayot» dasturi doirasida mahkuma ayollarga masofaviy oliy ta’lim olish imkonini yaratishni e’lon qildi.
8-mart – Xalqaro xotin-qizlar kuni munosabati bilan o‘tkazilgan tantanali tadbirda prezident Shavkat Mirziyoyev jazoni ijro etish muassasalaridagi ayollarni reabilitatsiya qilish va ularni jamiyatga moslashtirishga qaratilgan yangi tashabbusni ilgari surdi.
«Yangi hayot» dasturining asosiy yo‘nalishlari
Davlat rahbari tomonidan e’lon qilingan «Yangi hayot» dasturi doirasida mahkum ayollar uchun bir qator muhim imkoniyatlar yaratiladi:
-
Kasb-hunar o‘rgatish: Ayollar jazoni o‘tash davrida 3 oydan 6 oygacha bo‘lgan qisqa muddatli kasbiy dasturlarda o‘qitiladi va yakunda tegishli sertifikatga ega bo‘ladi.
-
Masofaviy oliy ta’lim: Mahkuma ayollarga jazoni ijro etish muassasalarining o‘zida imtihon topshirib, oliy o‘quv yurtlariga kirish va masofaviy shaklda tahsil olish imkoniyati yaratiladi.
-
Moliyaviy yordam: Kontrakt asosida o‘qishga qabul qilingan ayollarga yengillik beriladi. Ular jazoni o‘tab, ozodlikka chiqib, ishga joylashgandan so‘ng kontrakt pulini qaytarish sharti bilan foizsiz ssuda ajratiladi.
Maqsad – jamiyatga qaytarish
Ushbu choralar mahkum ayollarning jazoni o‘tab chiqqanidan so‘ng hayotda o‘z o‘rnini topishi, bandligini ta’minlash va ularni jamiyatning to‘laqonli a’zosi sifatida qayta integratsiya qilishga qaratilgan. Ta’lim va kasbiy malaka mahkumlar uchun ozodlikka chiqqach, qonuniy daromad manbaiga ega bo‘lish imkonini beradi.
