Farg‘ona shahridagi 3 ta bog‘chaning 51 nafar tarbiyalanuvchisi salomatligidan shikoyat qildi. Ularning 28 nafari shifoxonaga yotqizilgan, oziq-ovqat mahsulotlari ekspertizaga olindi.
Tarbiyalanuvchilarning ahvoli va shifoxonaga yotqizilishi
Farg‘ona shahrida joylashgan 2, 7 va 47-sonli maktabgacha ta’lim tashkilotlarining 51 nafar tarbiyalanuvchisi salomatligi yomonlashgani munosabati bilan shifokorlarga murojaat qildi. 26-oktyabr ertalabki holatga ko‘ra, bolalarning 28 nafari viloyat yuqumli kasalliklar shifoxonasida davolanmoqda, yana 23 nafari tibbiy ko‘rikdan so‘ng uyiga javob berilgan.
Kichkintoylarda tana haroratining ko‘tarilishi, qorin og‘rig‘i, darmonsizlik, ko‘ngil aynishi va ich ketishi alomatlari kuzatilgan. Oziq-ovqat mahsulotlari xavfsizligi qo‘mitasi axborotiga ko‘ra, shifoxonaga yotqizilgan bolalarning ahvoli barqaror deb baholanmoqda, og‘ir bemorlar yo‘q. Uyda davolanayotgan bolalarning ahvoli ham qoniqarli.
Epidemiologik surishtiruv va laboratoriya tahlillari
Epidemiologik surishtiruv doirasida mutaxassislar bog‘chalarda nonushta, tushlik va ikkinchi tushlik uchun berilgan oziq-ovqat mahsulotlari hamda tayyor taomlardan namunalar olgan. Mahsulot yetkazib beruvchilar shaxsi aniqlangan, olingan namunalar mikrobiologik va bakterialogik tahlildan o‘tkazilmoqda.
Hozircha kasallik sabablari hamda uning ovqatlanish bilan bog‘liqligi rasman tasdiqlanmagan, surishtiruv ishlari davom etmoqda. Avvalroq Toshkent viloyatidagi bog‘chalarning birida uch yoshli bola zararkunandalarga qarshi kimyoviy vositani ichib qo‘yishi oqibatida vafot etgan edi.
