Soliq qo‘mitasi hujjatlarsiz yerlardan foydalanganlik uchun 2020–2024-yillar oralig‘ida hisoblangan 3 barobarli yer solig‘i bekor qilinganini ma’lum qildi. Qayta hisob-kitob qilinadi.
O‘zbekistonda jismoniy shaxslar uchun yer uchastkasidan huquqni belgilovchi hujjatlarsiz foydalanilganda yer solig‘ini uch barobar miqdorda hisoblash tartibi bekor qilindi. Ushbu yengillik 2020-yil 1-yanvardan 2024-yil 1-iyungacha bo‘lgan davr uchun amal qiladi. Soliq qo‘mitasi matbuot xizmatining xabar berishicha, joriy yilning 15-iyunidagi O‘RQ-1153-sonli Qonun bilan Soliq kodeksining 483-moddasiga qo‘shimcha kiritilgan. Shunga ko‘ra, soliq organlari ko‘rsatilgan davr uchun ilgari oshirilgan stavkada hisoblangan soliqlarni qayta hisob-kitob qilib beradi.
Yangi qonun fuqarolarga qulaylik yaratish maqsadida yer munosabatlaridagi boshqa qator tartiblarni ham nazarda tutadi. Unga ko‘ra, o‘zboshimchalik bilan egallab olingan yerlar va ulardagi binolarga bo‘lgan huquqlarni tan olish jarayoni tezlashtiriladi hamda tegishli hujjatlarni ko‘rib chiqish muddati qisqartiriladi. Shuningdek, huquqlarni tan olganlik uchun bir martalik to‘lovni bo‘lib-bo‘lib to‘lash tartibi va shartlari belgilanadi.
Bundan tashqari, yer uchastkalariga bo‘lgan huquqlarni tan olishga to‘sqinlik qiluvchi ayrim mexanizmlar soddalashtiriladi hamda ushbu jarayondagi qonunbuzarliklar bo‘yicha shikoyatlarni ko‘rib chiqish tizimi takomillashtiriladi. Vakolatli tashkilotlarning mas’uliyati oshiriladi hamda fuqarolarga qulaylik yaratish uchun soliq qarzdorligining aniq tushunchalariga aniqlik kiritiladi.
