Sirdaryo viloyati Guliston tumanidagi “Ishonch” mahallasida quturgan chiyabori to‘rt nafar fuqaroga jarohat yetkazdi. Yirtqich zararsizlantirildi, jabrlanganlar shifoxonada.
Avvalroq ijtimoiy tarmoqlarda tumanda yirtqich hayvon odamlarga tashlanayotgani haqida xabarlar tarqalgan edi. Viloyat hokimligi matbuot xizmati ushbu ma’lumotni rasman tasdiqladi. Ma’lum qilinishicha, voqea joriy yilning 9-iyun kuni taxminan soat 17:30 larda “Ishonch” mahallasi yaqinidagi dala chetida sodir bo‘lgan.
Rasmiy ma’lumotlarga ko‘ra, dala maydoni yaqinida to‘satdan paydo bo‘lgan chiyabori to‘rt nafar mahalliy aholi vakiliga hujum qilib, ularga tan jarohati yetkazgan. Mahallada istiqomat qiluvchi fuqarolardan biri vaziyatni ko‘rib, zudlik bilan zarur choralarni ko‘rgan va yovvoyi yirtqichni voqea joyida zararsizlantirgan. Bu bilan u boshqa aholi vakillariga bo‘lgan xavfni butunlay bartaraf etgan.
Hujum oqibatida turli darajada jarohat olgan barcha fuqarolarga zudlik bilan birinchi tibbiy yordam ko‘rsatildi. Hozirda ular shifokorlarning qat’iy nazorati ostida bo‘lib, tibbiy holatlari qoniqarli ekani bildirilgan. Mutaxassislar tomonidan yirtqich hayvonning aholi yashash joyiga chiqib qolishi sabablari o‘rganilmoqda va hayvonda quturish kasalligi bor-yo‘qligini aniqlash bo‘yicha tekshiruv o‘tkazilmoqda.
