Tashqi mehnat migratsiyasi agentligi Fransiya dalalarida meva-sabzavot terimi bilan shug‘ullanish istagida bo‘lgan fuqarolar uchun qabul boshlanganini e’lon qildi. Nomzodlardan fransuz tilini bilish talab etiladi.
Rasmiy ma’lumotlarga ko‘ra, ishchilar Fransiyaning Men va Luara hamda Rona mintaqalaridagi dalalarda meva va sabzavotlar yig‘im-terimi bilan mashg‘ul bo‘ladilar. Rejaga muvofiq, meva plantatsiyalaridagi ishlar joriy yilning 17-avgustidan, sabzavotchilik yo‘nalishidagi mavsum esa 1-oktabrdan start oladi.
Xorijiy ish beruvchilar tomonidan nomzodlarga qat’iy talablar qo‘yilgan. Dasturda ishtirok etish uchun 25 yoshdan 45 yoshgacha bo‘lgan, muqaddam sudlanmagan hamda agrarsohada kamida uch yillik mehnat stajiga ega bo‘lgan erkaklar va ayollar ariza topshirishlari mumkin. Bundan tashqari, da’vogarlardan fransuz tilini kamida so‘zlashuv darajasida bilish talab qilinadi. Saralash bosqichlari fransuz tomoni vakillari tomonidan onlayn tarzda o‘tkaziladi.
Mavsumiy ishchilarning oylik ish haqi barcha soliqlar ushlab qolingandan keyin (sof holatda) 1650 yevroni tashkil etadi. Biroq shartnomada bir qator xarajatlar xodimning o‘z zimmasida ekani ko‘rsatilgan: bularga viza to‘lovi (99 yevro va viza markazi xizmati), aviachipta, oziq-ovqat hamda oyiga taxminan 275 yevroga tushadigan yashash joyi va transport xarajatlari kiradi.
Aviachipta va viza uchun sarflangan mablag‘larning bir qismi ishchi Fransiyada rasmiy mehnat faoliyatini boshlaganidan so‘ng Migratsiya agentligi tomonidan kompensatsiya qilib beriladi. Ariza topshirish muddati 20-iyungacha etib belgilangan.
Izohlar
Hozircha izohlar yo‘q