Germaniya Prezidenti Frank-Valter Shtaynmayer Toshkentga keldi. «Toshkent-Xumo» xalqaro aeroportida oliy martabali mehmonni Bosh vazir o‘rinbosari Ochilboy Ramatov kutib oldi.
Germaniya Federativ Respublikasi Prezidenti Frank-Valter Shtaynmayer rafiqasi bilan birgalikda rasmiy tashrif bilan O‘zbekistonga keldi. «Toshkent-Xumo» xalqaro aeroportida Germaniya rahbarini O‘zbekiston Bosh vazirining o‘rinbosari Ochilboy Ramatov va boshqa rasmiy shaxslar kutib oldi.
Tashrif dasturiga ko‘ra, ikki davlat rahbarlarining tor va kengaytirilgan tarkibdagi muzokaralari bo‘lib o‘tadi. Unda O‘zbekiston va Germaniya o‘rtasidagi ko‘p qirrali munosabatlarni yanada chuqurlashtirish masalalari ko‘rib chiqiladi.
Muzokaralarda asosiy e’tibor o‘zaro amaliy hamkorlikni kengaytirishga qaratiladi. Tomonlar savdo, sanoat kooperatsiyasi, energetika va «yashil» texnologiyalar, transport va logistika, farmatsevtika hamda kimyo tarmoqlari, shuningdek, qishloq xo‘jaligi sohalaridagi loyihalarni muhokama qiladilar. Ta’lim va gumanitar almashinuvlarni faollashtirish, xalqaro va mintaqaviy ahamiyatga molik dolzarb masalalar yuzasidan fikr almashish ham ko‘zda tutilgan. Uchrashuvlar yakunida bir qator yangi qo‘shma loyiha va dasturlarni ishga tushirish rejalashtirilgan.
Izohlar
Hozircha izohlar yo‘q