27–28-iyun kunlari O‘zbekistoning janubida harorat 44 darajagacha ko‘tariladi. Shimoli-g‘arbiy hududlarda esa kuchli yomg‘ir yog‘ishi prognoz qilinmoqda.
Yaqinlashib kelayotgan dam olish kunlarida O‘zbekiston hududida keskin farqli ob-havo sharoiti kuzatiladi: ayrim hududlarda yomg‘ir yog‘ib, shamol kuchaysa, boshqa joylarda anomal issiq harorat hukmron bo‘ladi.
Shanba, 27-iyun
-
Hududlar bo‘ylab: Toshkent viloyatining ayrim joylarida va Farg‘ona vodiysi viloyatlarida qisqa muddatli yomg‘ir yog‘ib, momaqaldiroq bo‘lishi mumkin. Respublikaning qolgan hududlarida yog‘ingarchilik kutilmaydi. Kunduzi havo harorati ko‘pchillik viloyatlarda +35…+40 daraja atrofida bo‘ladi.
-
Toshkent shahrida: Qisqa muddatli yomg‘ir yog‘ishi va momaqaldiroq bo‘lishi mumkin. Harorat kunduzi +38…+40 daraja, kechasi esa +23…+26 darajani tashkil etadi. Sharqiy shamol 3–8 m/s tezlikda esadi, vaqti-vaqti bilan 10–12 m/s gacha kuchayishi va poytaxtning ayrim joylarida chang-to‘zon kuzatilishi mumkin.
Yakka, 28-iyun
-
Hududlar bo‘ylab: Respublikaning shimoli-g‘arbiy tumanlarida ob-havo beqaror bo‘ladi. Qoraqalpog‘iston va Xorazm viloyatida joylarda yomg‘ir yog‘adi, ba’zi joylarda kuchli bo‘lishi mumkin. Ushbu hududlarda kunduzgi harorat +32…+37 daraja atrofida bo‘ladi, Qoraqalpog‘iston shimolida esa harorat +23…+28 darajagacha pasayadi.
-
Anomal issiq: O‘zbekistonning qolgan hududlarida yog‘ingarchilik kutilmaydi. Kunduzgi havo harorati ko‘pchilik viloyatlarda +35…+40 daraja, joylarda esa +42 darajagacha ko‘tariladi. Janubiy hududlarda issiq harorat eng yuqori nuqtaga — +43…+44 darajagacha yetadi.
-
Toshkent shahrida: Yog‘ingarchilik kutilmaydi. Kunduzi havo harorati yanada ko‘tarilib, +39…+41 darajaga yetadi. Kechasi esa +23…+26 daraja bo‘ladi. Shamol tezligi va shaharning ayrim joylarida chang-to‘zon bo‘lishi ehtimoli shanba kunidagi darajada saqlanib qoladi.
Shamol kuchayishi va sel kelish xavfi
Respublika bo‘ylab shamol tezligi 7–12 m/s bo‘lishi kutilmoqda, ba’zi joylarda u 13–18 m/s gacha kuchayishi mumkin. Shimolda va cho‘l zonalarida shamol tezligi 20–22 m/s gacha yetishi va chang-to‘zonlar kuzatilishi mumkin. Respublikaning tog‘oldi va tog‘li hududlarida vaqti-vaqti bilan qisqa muddatli yomg‘ir yog‘ib, momaqaldiroq bo‘lishi hamda sel-suv toshqini hodisalari yuzaga kelishi xavfi bor.
