“Toshkent metropoliteni” DUK 13-iyundan boshlab “Chinor” bekatini yo‘lovchilar uchun vaqtincha yopadi. 50 kun davomida bu yerda liftlar va qo‘shimcha turniketlar o‘rnatiladi.
Loyiha doirasida bekatda tubdan qayta qurish ishlari bajarilishi rejalashtirilgan. Xususan, bekatning kirish va chiqish hududlari kengaytiriladi hamda tirbandliklarning oldini olish uchun qo‘shimcha 12 ta zamonaviy turniket o‘rnatiladi.
Shuningdek, imkoniyati cheklangan shaxslar, keksalar va yosh bolali yo‘lovchilarga qulaylik yaratish maqsadida bekatda 4 ta zamonaviy lift montaj qilinishi ko‘zda tutilgan.
Ta’kidlanishicha, qurilish va ta’mirlash ishlarini yakunlash uchun 50 kun talab etiladi. Yo‘lovchilarga noqulaylik tug‘dirmaslik maqsadida “Chinor” va “Yangi hayot” (sobiq 4-bekat) bekatlari o‘rtasida maxsus metrobuslar harakati yo‘lga qo‘yiladi. Ular tasdiqlangan grafik asosida poyezdlar harakatiga muvofiq ravishda qatnaydi.
