Toshkent viloyatida ayolni o‘ldirib, jasadini bir oy davomida hovlisida yashirib kelgan 27 yoshli shaxsga sud hukmi o‘qildi. U uzoq muddatli qamoq jazosiga mahkum etildi.
Tergov hujjatlariga ko‘ra, sudlanuvchi Instagram ijtimoiy tarmog‘i orqali ajrashgan ayol bilan tanishib qolgan. Ma’lum muddatlik virtual muloqotdan so‘ng, ayol voyaga yetmagan o‘g‘li bilan erkakning xonadoniga ko‘chib o‘tgan va ular birga yashay boshlagan. Biroq, erkakning so‘zlariga ko‘ra, marhumaning spirtli ichimliklar hamda psixotrop vositalarga ruju qo‘yganligi sababli oilada tez-tez jiddiy kelishmovchiliklar kelib chiqqan.
2025-yilning 2-dekabridan 3-dekabrga o‘tar kechasi mast holatda bo‘lgan erkak va ayol o‘rtasidagi navbatdagi mojaro fojia bilan tugadi. Uy egasi ayoldan kiyimlarini va bolasini olib, uydan chiqib ketishini talab qilgan, ayol esa qo‘liga pichoq olib qarshilik ko‘rsatgan. Janjal jarayonida erkak uni yuz qismidan qattiq itarib yuborgan, oqibatda ayol boshi bilan betonga yiqilib, voqea joyida vafot etgan.
Erkak o‘z qilmishini yashirish maqsadida orqa hovlida qabr kovlab, jasadni yuvib ko‘mib qo‘ygan. Dalillarni yo‘qotish maqsadida esa qon tekgan kiyimlarni va marhumaning telefon SIM-kartalarini yoqib yuborgan. Oradan qariyb bir oy o‘tib, 2025-yilning 27-dekabr kuni ichki ishlar xodimlari tomonidan jasad qazib olindi. Sud hukmi bilan aybdor shaxs 15 yil-u 6 oy muddatga ozodlikdan mahrum etildi.
Izohlar
Hozircha izohlar yo‘q