Yunusobodda avtoyuvish shoxobchasi ishchisi mijozning mashinasini qismlarga bo‘lib sotish va pulini Portugaliya termasi g‘alabasiga tikish uchun o‘g‘irladi. Jinoyatchi tezda qo‘lga olindi.
Poytaxtning Yunusobod tumanida qimor va futbolga tikilgan garov sabab g‘ayrioddiy jinoyat sodir etildi. Avtoyuvish shoxobchalarining birida ishlovchi xodim mijoz tomonidan qoldirilgan Spark rusumli avtomobilni ruxsatsiz olib qochgan. Toshkent shahar IIBB Jinoyat qidiruv boshqarmasi hamda YHXB xodimlarining tezkor harakatlari natijasida transport vositasi va uni boshqargan shaxs Bektemir tumanida to‘xtatilib, qo‘lga olindi.
Sodir etilgan qilmish sababi o‘rganilganda, gumonlanuvchining tavakkalchilikka asoslangan rejalari fosh bo‘ldi. Ma’lum bo‘lishicha, u Spark’ni tezda ehtiyot qismlarga bo‘lib sotib yubormoqchi bo‘lgan. Tushgan barcha pullarni esa 1xBet platformasi orqali Portugaliya terma jamoasining g‘alabasiga tikishni maqsad qilgan. Shu yo‘l bilan u katta yutuqni qo‘lga kiritib, bor qarzdorliklarini yopishni rejalashtirgan, biroq uning o‘ylagan rejasi butkul barbod bo‘ldi. Hozirda tergovoldi tekshiruv ishlari ketmoqda. Avtotransport vositasini talon-toroj qilish maqsadida olib qochgan shaxs Jinoyat kodeksining 267-moddasiga asosan 10 yildan 15 yilgacha ozodlikdan mahrum etilishi mumkin.
Izohlar
Hozircha izohlar yo‘q