Chegara demarkatsiyasi doirasida Cho‘ng‘ara va Tosh-Tobo qishloqlari Qirg‘izistonga o‘tdi. Buning badaliga O‘zbekiston teng maydonli yerlar oldi, shuningdek, yangi yo‘l uchun 236 ga yer almashildi.
Qirg‘iziston prezidenti matbuot kotibi Askat Alagozovning ma’lum qilishicha, ushbu aholi punktlarida asosan etnik qirg‘izlar istiqomat qiladi. Qishloqlarning 2,5 mingga yaqin aholisi yaqin orada ro‘yxatdan o‘tkaziladi va ularga Qirg‘iziston fuqaroligi beriladi. Ushbu hududlar evaziga O‘zbekiston tomoni chegaradosh hududdan teng maydonli yer uchastkalarini qabul qilib oldi.
Bundan tashqari, tomonlar Say hamda Tayan qishloqlari o‘rtasida yangi avtomobil yo‘lini barpo etish maqsadida umumiy maydoni 236 gektar bo‘lgan teng qiymatli yer maydonlarini ham o‘zaro almashishdi.
Shuning bilan birga, Qirg‘iziston hukumati hududiy almashuv bo‘yicha Qozog‘istonga ham taklif kiritgan. Toqmoq shahri yaqinidagi yo‘lning 800 metrlik qismini almashtirish orqali Olmati ko‘chasidan Kemin shahrigacha bo‘lgan masofada uzunligi qariyb 150 kilometrlik pullik avtomagistral qurish rejalashtirilmoqda.
Izohlar
Hozircha izohlar yo‘q