Soliq qo‘mitasi tomonidan banklar tomonidan yuridik va jismoniy shaxslarning hisobvaraqlari yoki omonatlariga (depozitlariga) oid axborotlarni soliq organiga taqdim etish tartibi to‘g‘risidagi nizom loyihasi jamoatchilik muhokamasiga qo‘yildi. Mazkur chora yashirin iqtisodiyot ulushini qisqartirish hamda bank-soliq o‘zaro axborot almashinuvini raqamlashtirish maqsadida ishlab chiqilgan.
Hujjat loyihasiga ko‘ra, banklar mijozlarning hisobvaraqlari ochilgani va yopilgani to‘g‘risidagi ma’lumotlarni soliq organlariga elektron shaklda ma’lum qilishi, shuningdek, so‘rovga ko‘ra axborot taqdim etishi shart bo‘ladi. Eng ko‘p muhokamalarga sabab bo‘layotgan bandga muvofiq, agar jismoniy shaxsning bank kartalariga bir kalendar oy davomida boshqa shaxslardan (yaqin qarindoshlar bundan mustasno) BHMning 500 baravariga teng yoki undan oshadigan summada mablag‘ kelib tushsa, banklar bu haqda soliq organlariga xabar berishi shart etib belgilanmoqda. Bundan tashqari, chet el yuridik shaxslariga o‘tkazilgan mablag‘lar haqidagi ma’lumotlar ham taqdim etiladi.
Yangi tartibni joriy etish uchun Soliq qo‘mitasi va Markaziy bankka ikki oy muddatda avtomatlashtirilgan “Bank-soliq” axborot almashish maxsus modulini ishlab chiqish, to‘rt oy ichida esa banklar tizimini ushbu modul bilan to‘liq integratsiya qilish vazifasi yuklatilmoqda.
Izohlar
Hozircha izohlar yo‘q