Iste’molchilar huquqlarini himoya qilish qo‘mitasi Rinoksil Formula+ dori vositasining axloqsiz reklamasi uchun Nika Pharm kompaniyasini jazoladi. Reklamada tarixiy shaxslar dorini tavsiya qilgan.
Reklama materiallarida dunyoga mashhur tarixiy shaxslar — Amir Temur, Alisher Navoiy, Ibn Sino, Jorj Vashington, Yuliy Sezar va Napoleon Bonapart obrazlaridan foydalanilib, ular go‘yoki ushbu dorini qabul qilgani haqida asossiz iddaolar ilgari surilgan.
Ushbu holat ijtimoiy tarmoq foydalanuvchilari o‘rtasida keskin e’tirozlar va salbiy reaksiyani keltirib chiqardi. Qo‘mita bayonotida ta’kidlanishicha, buyuk tarixiy shaxslar xotirasiga hurmat ko‘rsatish milliy madaniyat va an’analarning ajralmas qismidir, ularning qiyofasini tijoriy dori-darmonlar reklamasiga olib kirish esa odob-axloq qoidalariga mutloqo ziddir. “Reklama to‘g‘risida”gi qonunning 16-moddasiga binoan, qonunchilik hujjatlarida umumiy axloq, milliy va oilaviy qadriyatlarga zid keluvchi obrazlardan foydalanish taqiqlanadi. Shu sababli, kompaniyaga nisbatan pul jarimasi qo‘llanildi va videolarni zudlik bilan tarmoqdan o‘chirish bo‘yicha majburiy ko‘rsatma berildi.
Ma’lumot o‘rnida, ushbu ishlab chiqaruvchi birinchi marta qonun buzilishi holatiga yo‘l qo‘yayotgani yo‘q. 2025-yilning sentyabr oyida ham Nika Pharm kompaniyasi “Forsil – og‘riq izsiz yo‘qoladi” degan shior ostida dori vositasini reklama qilgani uchun javobgarlikka tortilgan edi. O‘shanda nazorat organi retseptsiz beriladigan dorilar reklamasida uning shifobaxsh ta’sirini kafolatlovchi gap-so‘zlardan foydalanish qonunan taqiqlanishini eslatib o‘tgan edi.
